Kusikiliza na kuzungumza: Kusikiliza na kujibu

Kichocheo

1. Je, unaposikiliza mtu akizungumza unafaa kufanya nini ili uupate ujumbe kikamilifu?
2. Unapomjibu mtu katika mazungumzo, unazingatia mambo gani ili akuelewe vilivyo?

Shughuli ya 1

Vipengele vya kuzingatia katika usikilizaji wa mazungumzo

1. Tazama picha hii

1. Mweleze mwenzako kuhusu picha uliyoitazama. Unaweza kuongozwa na maswali haya:
   1. Unafikiri ni kwa nini Simba ameshika pua yake?
   2. Ni ishara gani inayoonyesha kuwa Mnyama Mgeni anamsikiliza Simba kwa makini?
   3. Unafikiri ni kwa nini Simba wameangaliana ana kwa ana na Mnyama Mgeni?
2. 1. Sikilizeni mazungumzo kati ya Simba na Mnyama Mgeni ambayo mwalimu atawasilisha.
   2. Taja vitendo ambavyo wanyama walifanya kuonyesha kuwa walikuwa wanasikiliza wakati wa mazungumzo yao.
   3. Eleza umuhimu wa vitendo vifuatavyo unapomsikiliza mwenzako:
      1. kusikiliza kwa makini
      2. kumtazama mzungumzaji
      3. kutikisa kichwa
      4. kutumia vihisishi
      5. kuepuka vizuizi vya mawasiliano.

Shughuli ya 2

Vipengele vya kuzingatia katika kujibu mazungumzo

Ukiwa na mwenzako:

1. Jadilini tabia za kinidhamu alizozingatia Mnyama Mgeni wakati wa kumjibu Simba.
2. Mweleze kwa nini ni muhimu kuzingatia tabia zifuatazo wakati wa kumjibu mtu katika mazungumzo:
   1. kutumia lugha ya adabu
   2. kutomkata kalima mzungumzaji
   3. ubadilishanaji zamu ufaao
   4. kujibu kwa kujikita katika kiini cha swali.

Shughuli ya 3

Vipengele vifaavyo katika kusikiliza na kujibu mazungumzo

1. Mkiwa wawiliwawili, zungumzieni kuhusu usafi wa mwili mkizingatia:
   1. kusikiliza kwa makini
   2. kumtazama mzungumzaji kwa makini ili upate ishara za uso
   3. kutikisa kichwa ili kuonyesha kukubaliana na kauli
   4. kutumia maneno au vihisishi vya kuhimiza kuendelea kuzungumza kama vile ehee!
   5. kuepuka vizuizi vya mazungumzo
   6. kutumia lugha ya adabu
   7. kutomkata kalima mzungumzaji
   8. kubadilishana zamu ifaavyo wakati wa mazungumzo
   9. kujibu kwa kujikita katika kiini cha swali.

Changamkia

Igiza mazungumzo ya simu na mwenzako. Zungumzieni kuhusu usafi wa kibinafsi.